PCUP FODL nakibahagi sa NSCR-Ex LIAC Meeting sa Biñan
22 Hulyo 2021
Nakibahagi sa isinagawang North-South Commuter Railway Extension Project (NSCR-Ex) Local Inter-Agency Committee (LIAC) Meeting – Biñan noong ika-15 ng Hulyo ang Presidential Commission for the Urban Poor (PCUP) – Field Operations Division for Luzon (FODL) sa pamamagitan nina FODL TOASG Personnel, Ms. Shella Largo at Mr. Nonilon Cajandab Jr.
Pinasinayaan naman ng kanya-kanyang ahensya ang paglalahad ng bawat update sa mga gampanin at napagkasunduan sa nakaraang LIAC na ginanap noong ika-17 ng Hunyo. Una na rito ang update patungkol sa land appraisal at resolusyon na naglalayong masiguro na ang mga pamilyang maapektuhan ng proyekto ng gobyerno o Project Affected Persons (PAPs) ay may sapat na matatanggap na tulong at maayos na relokasyon.
Dagdag pa rito, inilatag din ng DOTr ang mga naging usapan sa ginanap na Livelihood Sub-Committee meeting na kung saan ay inihayag dito ang mga programang pangkabuhayan ng ilan sa mga ahensyang kasapi ng komite at ng Lokal na Pamahalaan ng Biñan para sa mga PAPs tulad na lamang ng Livelihood/Technical Skills Training at mga trabaho. Sinamantala na rin ng DHSUD na buksan ang usapin sa pagsasagawa ng Livelihood Workshop. Dito ay inihayag ng DOTr ang suhestiyon nito na pag-usapan itong mabuti sa darating na Livelihood Sub-committee meeting.
Bilang bahagi ng gampanin ng Komisyon sa ilalim ng pamumuno ni PCUP Chairman at CEO, Usec. Alvin S. Feliciano, patuloy ang pakikibahagi ng PCUP sa mga ganitong pagpupulong upang masiguro na naaayon sa batas at dumadaan sa ligal na proseso ang bawat usapin sa paninirahan gayundin ay upang matiyak ang karapatan ng bawat pamilyang maapektuhan ng proyekto ng pamahalaan at mabigyan ang mga ito ng nararapat na relokasyon. ###
via | PCUP Luzon
PCUP FODL at TESDA-Tarlac, nagpulong
21 Hulyo 2021
Upang higit pang maisakatuparan ang pakikipagtulungan sa pagitan ng Presidential Commission for the Urban Poor (PCUP) at Technical Education and Skills Development Authority (TESDA), nakipagpulong ang Field Operations Division for Luzon kasama ang TESDA-Tarlac sa Lokal na Pamahalaan ng Tarlac City, nitong Lunes Hulyo 19.
Ipinakilala sa Tarlac City-LGU nina Ms. Ma. Elizabeth B. Avila – FODL Assistant Chief of Operations at Mr. Ju-Arthur D. Celiz – Area Coordinator, kasama si Mr. Gerry Gomez, TESDA Admin Staff, ang kasunduang nilagdaan sa pagitan ng PCUP at TESDA na may layunin na higit na maipaabot sa maralitang sektor ang kalidad at epektibong teknikal na pagsasanay na makatutulong sa kanila upang makahanap ng trabaho.
Kasunod nito, hiningi ni Ms. Avila ang suporta ng Lokal na Pamahalaan sa pamamagitan ng pagtukoy sa mga maralitang higit na nangangailangan ng libreng pagsasanay.
Ikinatuwa naman ni Councilor Emily Facunla ang balitang ito at pinasalamatan ang inisyatiba ng dalawang ahensya na aniya ay napapanahon sa isang pandemyang nakaapekto sa trabaho at kabuhayan ng marami. Ipinangako ni Coun. Facunla ang pag-eendorso ng 150 mga maralitang maaring makinabang sa libreng pagsasanay ng TESDA.
Ang kasunduang ito ng PCUP sa TESDA ay nilagdaan ni Chairman at CEO, Usec. Alvin S. Feliciano bilang tugon sa malawakang kawalan ng trabaho at kabuhayan sa panahon ng pandemya at pagpapalakas sa pang-ekonomikong kakahayan ng mga maralitang tagalungsod. ###
via | PCUP Luzon
DOH-Region V, naghandog ng gamot at bitamina sa PCUP FODL bilang pakikiisa sa PCUP Mini-Caravan
21 Hulyo 2021
Bilang pakikiisa sa gaganaping PCUP Mini-Caravan sa Iriga City, naghandog ang Department of Health ng mga gamot at bitamina sa PCUP – Field Operations Division for Luzon (FODL), noong ika-18 ng Hulyo.
Personal na tinungo ni Mr. Victor Allan C. Ilagan, Area Coordinator ng Bicol Region, ang tanggapan ng DOH-Region V upang kunin ang mga donasyong gamot at bitamina nito. Siya ay malugod na pinaunlakan nina Mr. Bernard A. Mongo, RM, RN, EMT at Ms. Myrna Rayala, RN.
Nakatakda ang mga medisinang ito na ipamahagi sa mga kababayan nating bikolano sa gaganaping Mini-Caravan sa Iriga City, Camarines Sur sa susunod na Miyerkules, ika-28 ng Hulyo.
Ang Mini-Caravan ay isa sa Three Priority Programs ng PCUP sa ilalim ng pamumuno ni Chairman at CEO, Usec. Alvin S. Feliciano. Sa pamamagitan nito ay ihahatid ng Komisyon ang serbisyo mula sa iba’t ibang ahensya ng pamahalaan patungo sa mga komunidad.
Buo naman ang pasasalamat ng PCUP sa Department of Health sa pakikiisa nito sa malawakang pagbibigay serbisyo para sa tao. ###
via | PCUP Luzon
Konsultasyon ukol sa kahihinatnan ng nasa 131 pamilyang maapektuhan ng proyektong pagpapalawak at pagpapabuti ng pasilidad ng Tayug–PNP, isinagawa ng PCUP FODL
21 Hulyo 2021
Upang inisyal na mapag-usapan ang kahihinatnan ng nasa 131 pamilyang maapektuhan ng proyektong pagpapalawak at pagpapabuti ng pasilidad ng Tayug–PNP, aktibong nakibahagi ang Presidential Commission for the Urban Poor (PCUP) sa isinagawang konsultasyon sa Tayug Central Elementary-North, Tayug, Pangasinan, noong ika-12 ng Hunyo.
Ang lupaing pinag-uusapan ay donasyon ng Lokal na Pamahalaan sa kapulisan noon pang 1930’s upang magsilbing lugar ng kanilang pagsasanay. Sa proyektong pagpapaunlad na ito ng kasalukuyang PNP ay inaasahan na may mga pamilyang maaapektuhan.
Sa katauhan ni Ms. Ma. Elizabeth B. Avila – Assistant Chief, Field Operations Division for Luzon, ay binigyang diin ng PCUP ang mga hinihingi ng Section 28 ng Republic Act 7279 o Urban Development and Housing Act of 1992—partikular ang pagsisiguro ng relokasyon para sa mga apektado kung sila ay maituturing na kapus-palad.
Iminungkahi ng Tayug-PNP na ang Lokal na Pamahalaan na ang siyang mamahala at magbigay ng relokasyon sa mga apektado. Ani naman ni Ms. Avila, nangangailangan din ang pagsagawa ng balidasyon kaugnay ng listahan ng mga apektadong pamilya na isinumite ng Tayug-PNP.
Pinag-aaralan naman Tayug-LGU ang posibilidad na magpasa ng resolusyon ng pagpapawalang-bisa sa donasyon ng naturang lupain sa kapulisan, ito ay sa kadahilanang hindi umano nakumpleto ang mga dokumentasyon sa pagsasagawa ng donasyong ito.
Sa huli, nasa panig na ng kapulisan ang gampaning makumpleto ang mga kahingian upang makakuha ng Certificate of Compliance mula sa Local Housing Board sa lugar at tuluyang maisagawa ang kanilang proyekto.
Patuloy naman ang pagmonitor ng PCUP sa kasong ito at iba pang sitwasyon kung saan maralitang lungsod ang posibleng apektado. Ito ay sa ilalim pa rin ng direktiba ni PCUP Chairman/CEO, Usec. Alvin S. Feliciano na nag-uutos na paigtingin ang pagmomonitor sa mga kaparehong sitwasyon. ###
via | PCUP Luzon
PCUP FODL, nag-organisa ng dayalogoupang linawin ang tamang proseso lalo't higit walang naipakitang dokumento ang mga diumano'y mga nagmamay-ari nito
21 Hulyo 2021
Bilang tugon sa paghingi ng tulong ng Malabanban Black Nazarene Village HOAI kaugnay ng kanilang adhikain na mabili ang lupang kanilang tinitirhan, nag-organisa noong Hulyo 12 ng isang dayalogo ang Presidential Commission for the Urban Poor (PCUP) Field Operations Division for Luzon (FODL) kasama ang iba’t ibang ahensya upang linawin ang tamang proseso lalo't higit walang naipakitang dokumento ang mga diumano'y mga nagmamay-ari nito.
Pinangunahan nina Mr. Robert U. Bonifacio—FODL Officer-in-Charge at ni Ms. Rica Pakingan—Area Coordinator ng Quezon, ang konsultasyon na dinaluhan ng mga kinatawan mula sa Candelaria Mayor’s Office, Quezon Province-DENR, Assessor’s Office, MPDC, Tayabas-CENRO, Malabanban Sur Barangay, Dassal Federation at MBNV HOAI.
Ayon sa datos ng DENR may rehistradong survey claimant ang nasabing lupain. Subali't hindi matukoy kung ang umano'y nagpapakilalang may ari ay tagapagmana nito. Nangako naman ang mga lumahok na ahensya na tutulong sa pagkumpirma sa usaping ito batay sa kanilang mga pinanghahawakang impormasyon.
Iminungkahi ng mga opisyal na magsagawa ng susunod pang dayalogo kung saan iimbitahan naman ang mga diumanong nagmamay-ari sa pinag-uusapang lupa upang mahingan ng karampatang dokumentasyon at patunay ng pagmamay-aari.
Susulat naman ang PCUP sa Land Registration Authority at Treasury Office upang higit na mabigyang linaw ang estado lupang pinag-uusapan.
Suportado naman ito ng Komisyon sa ilalim ng direktiba’t pamumuno ni Chairman at CEO, Usec. Alvin S. Feliciano na hangarin ang seguridad sa paninirahan para sa mga maralitang lungsod. ###
via | PCUP Luzon