Livelihood Training on Dishwashing Liquid Making ng PCUP FODL, malaking tulong sa Salvacion Ilaw Village HOAI
13 Oktubre 2021
Labis ang naging pasasalamat ni Ms. Corazon Bañadera sa PCUP – Field Operations Division for Luzon (FODL) matapos itong makadalo sa isinagawang livelihood training ng Komisyon noong ika-12 ng Oktubre. Aniya, “Sa kabila ng pandemya, marami pong salamat sa pagkakataong matuto ng kasanayan na maaring mapagkunan ng kabuhayan.”
Ayon kay PCUP Chairman at CEO, Usec. Alvin S. Feliciano, layunin ng aktibidad na makapaghatid ng mga kapaki-pakinabang na pagsasanay at programa sa mga maralitang tagalungsod lalo’t higit sa mga lugar na apektado ng pandemya.
Isa lamang si Ms. Bañadera sa mga piling kasapi ng Salvacion Ilaw Village HOAI na nabigyang oportunidad na makapagsanay sa paggawa ng dishwashing liquid at tumanggap ng livelihood starter kits mula sa Komisyon sa pangangasiwa ni Mr. Victor Allan C. Ilagan—PCUP Luzon Area Coordinator, sa pakikipagtulungan sa National Housing Authority (NHA) – Region 5.
Ang mga kalahok ay hinikayat ding ipagpatuloy sa maliit na negosyo ang panimulang ito tulad ng iba pang maralitang samahan na sumailalim sa nasabing programa na ngayon ay may sariling kabuhayan na. ###
via | PCUP Luzon
PCUP FODL, nagsagawa ng balidasyon, konsultasyon hinggil sa isang kaso ng demolisyon, ebiksyon sa Sta. Maria, Bulacan
13 Oktubre 2021
Isang balidasyon at konsultasyon ang isinagawa ng PCUP – Field Operations Division for Luzon (FODL) noong ika-11 ng Oktubre kaugnay ng isang kaso ng demolisyon at ebiksyon sa Sta. Maria, Bulacan na kung saan ay may apat na pamilya ang maaapektuhan.
Ani PCUP Chairman at CEO, Usec. Alvin S. Feliciano, mas maigting na pagmomonitor sa mga kaso ng demolisyon at ebiksyon sa bansa ang ipinapatupad ngayon ng Komisyon nang sa gayon ay masiguro na walang sinuman sa mga maralitang tagalungsod ang matatapakan ang mga karapatan lalo na sa usapin ng paninirahan.
Dito ay personal na tinungo ni PCUP Luzon Area Coordinator, Mr. Ju-Arthur D. Celiz ang mga apektadong pamilya upang ipaliwanag ang gampanin ng PCUP sa pagsasagawa ng Pre-Demolition Conference (PDC) bago pa man ang pagpapatupad ng anumang demolisyon at ebiksyon na kinasasangkutan ng mga underprivileged and homeless citizen. Ito ay alinsunod sa isinasaad ng Urban Development and Housing Act of 1992 (UDHA) o Republic Act 7279.
Nauna nang nakipag-ugnayan ang Komisyon sa Lokal na Pamahalaan ng Sta. Maria, Bulacan upang kumpirmahin ang socio-economic profile ng apektadong pamilya kung pasok ba ito sa kwalipikasyon bilang underprivileged and homeless. Kasabay nito, tinukoy na rin ng Komisyon ang posibleng tulong na maaaring maiabot ng lokal na pamahalaan sa mga apektadong pamilya. ###
via | PCUP Luzon
PCUP FODL, Fed. of Coron Farmers and Fisherfolks nagpulong upang talakayin ang kanilang estado at hinaing
13 Oktubre 2021
Nagpulong ang PCUP – Field Operations Division for Luzon (FODL) at mga opisyales ng Federation of Coron Farmers and Fisherfolks, sa pamamagitan ni Mr. Rudy Cadampog, Federarion President at Dr. Raymond Echague, Board of Director noong ika-09 ng Oktubre upang talakayin ang katayuan ng samahan at kung paano makatutulong ang Komisyon sa kanilang kinakaharap na suliranin.
Ang inisyatibang ito, ayon kay PCUP Chairman at CEO, Usec. Alvin S. Feliciano ay naglalayong makapagbigay ng angkop na tulong sa mga isyu at problemang ligal ng mga nasabing residente.
Ayon kay Mr. Cadampog, labis na naghirap ang mga magsasaka at mangingisdang kasapi ng kanilang samahan dahil sa pagbagsak ng turismo sa kanilang bayan at maraming nawalan ng hanapbuhay dahil sa pagsasara ng mga negosyo. Dagdag pa rito, marami sa kanilang mga produkto ay hindi na gaanong tinangkilik dahil mga residente na lamang ang kanilang mamimili at marami ang nasasayang dahil hindi nabibili.
Hiling ni Mr. Echague, nawa’y mailapit ang samahan sa mga ahensya ng pamahalaan na nagbibigay ng libreng binhi para sa kanilang 1,200 na kasaping magsasaka. Dagdag pa ni Mr. Cadampog, sana ay mabigyan ng financial grant ang kanilang Multi-Purpose Cooperative at puhunan ang kanilang binabalak na social enterprise kung saan malaking tulong ito sa kanilang mga kasapi, lalo na para sa mga nawalan ng hanapbuhay.
Sa usaping palupa naman, umaasa pa rin ang samahan na mabiyayaan sila ng lupa mula sa YKR Property na kasalukuyang nasa pangangalaga ng DENR matapos itong ma-sequester ng PCGG. ###
via | PCUP Luzon
PCUP FODL, nagsagawa ng CBP on Fabcon Making sa Coron, Palawan
12 Oktubre 2021
Nagsagawa ng Capability Building Training on Livelihood Fabcon Making ang PCUP – Field Operations Division for Luzon (FODL) sa Coron, Palawan na dinaluhan ng mga kasapi ng Samahan ng Kababaihan sa Coron sa pakikipagtulungan ng MSWD-Coron.
Ani PCUP Chairman at CEO, Usec. Alvin S. Feliciano, layunin ng aktibidad na ito na magbigay ng mga bagong kaalaman at kasanayan sa mga maralitang tagalungsod hinggil sa mga bagay na may kaugnayan sa kanilang pag-unlad.
Dahil sa pagsasara ng isla sa mga turista na siyang pangunahing pinagkukunan ng kabuhayan ng bayan, maraming mga pamilya ang nalugmok ang kabuhayan at tila nawalan ng pag asa. Ayon sa mga dumalo, naaangkop ang nga ganitong training dahil karamihan sa kanila ay nawalan ng trabaho dulot ng pandemya.
Maliban sa fabric conditioner making, ipinakilala rin sa mga nagsipaglahok ang PCUP bilang ahensiya ng pamahalaan na itinatag upang magsilbing tulay ng maralita sa pamahalaan, lalo na sa tanggapan ng Pangulo at makakuha ng akmang suporta at programang tutugon sa kanilang pangangailangan. Nagbahagi rin ng ilang business principles, pamamaraan ng pagnenegosyo, pag-iingat sa salapi at wastong pamamahala at pagpapaikot ng kita ang Komisyon.
Inalam naman ng mga dumalo kung saan maaaring bumili ng raw materials sakaling nais nilang ipagpatuloy ang kanilang negosyong fabcon at dito ay tiniyak ng MSWD-Coron na kanilang susubaybayan ang pagsusulong ng kabuhayan ng mga kababaihang dumalo sa naturang pagsasanay. ###
via | PCUP Luzon
PCUP FOD-NCR, nagbaba ng skills training sa paggawa ng dishwashing liquid sa Malanday, Valenzuela
12 Oktubre 2021
Nagbaba ng isang skills training sa paggawa ng dishwashing liquid ang PCUP – Field Operations Division for NCR (FOD-NCR) para sa 33 kalahok mula sa Malanday Unity Urban Poor, Simula’t Wakas HOA, at Tahanan Walang Tungtungan Inc. na ginanap noong ika-08 ng Oktubre sa 3S Function Room Barangay Malanday, Valenzuela City.
Ang programang ito ay isa sa mga patuloy na isinusulong ni PCUP Chairman at CEO, Usec. Alvin S. Feliciano upang bigyan ng mga bagong kaalaman at kasanayan ang mga maralitang tagalungsod na kanilang magagamit sa pag-asenso.
Samantala, ang naturang aktibidad ay pinangunahan ni Mr. Crispulo Calicdan—PCUP NCR Assistant Head katuwang si Ms. Nikka Candelaria at Mr. Clark dela Pierre ng PCUP NCR TOASG. ###
via | PCUP NCR