PCUP ResU, nagsagawa ng CCAM-DRRM training para sa mga residente ng Rodriguez, Rizal
22 Disyembre 2021
Muling tinungo ng PCUP Resettlement Unit (ResU) sa pangunguna nina Mr. Noli Madeja, Mr. Mark Pangilinan, Mr. Paul John Constante, at Mr. Mark Denver Balagtas—Area Coordinators nitong Disyembre 17 at 20, 2021, ang Southville 9 ng Baras at Southville 8C 1K2 Kasiglahan Village sa Rodriguez, Rizal para magkaloob ng kasanayan tungkol sa Climate Change Adaptation, Mitigation and Disaster Risk Reduction Management (CCAM-DRRM).
Sa pagsisimula ng programa ay malugod na binati ni PCUP Chairperson at CEO, Undersecretary Alvin S. Feliciano ang mga kalahok sa pamamagitan ng AVP, at ito ay sinundan ng inihandang presentasyon ng PCUP Res U tungkol sa CCAM-DRRM.
Nagkaroon din ng talakayan kasama ang DRRM Officer ng Rodriguez upang mabigyan ng karagdagang kaalaman ang mga residente tungkol sa mga proyekto ng pamahalaang lokal sa nasabing paksa.
Nagsagawa din ng isang open forum kung saan naglahad ang mga pinuno ng mga nasabing pabahay ng kanilang mga karanasan at isinagawang mga inityatiba upang hindi na muling maulit ang mga nangyaring trahedya sa kanila.
Samantala, isinagawa ang nasabing gawain bilang paghahanda sa mga posibleng kaharapin na sakuna o trahedya sa mga nasabing pabahay. Matatandaan na sa mga nakaraaang taon, ang mga nasabing pabahay ay nakaranasan ng matinding pagbaha dulot ng mga bagyo.
Matapos ang pagsasanay, ang mga kalahok ay nabigyan ng health kits mula sa Komisyon upang patuloy na mapanatili ang kaligtasan ng lahat sa gitna ng pandemya. ###
via | PCUP Resettlement Unit
‘Awarding of 60 National Agencies as Part of PCUP Programs and Services' ng PCUP, isinagawa
21 Disyembre 2021
Bilang bahagi ng selebrasyon ng Urban Poor Solidarity Week 2021 na may temang ‘Ika-35 Taon ng Makabuluhang Paglilingkod; Malasakit, Kaisa’t Kaagap ng Maralita’, nagbigay-pugay kahapon, Disyembre 20, ang Presidential Commission for the Urban Poor (PCUP) sa mga naging katuwang nito sa pamamagitan ng programang: ‘Awarding of 60 National Agencies as Part of PCUP Programs and Services.’
Sa pagsisimula ng munting awarding ceremony ay nagbigay ng kanyang mensahe si PCUP Chairperson at CEO, Usec. Alvin S. Feliciano at ipinabatid nito ang kanyang pasasalamat na kahit may pandemya ay nai-roll out ng PCUP, sa tulong ng mga partner-agencies nito, ang mga programa at serbisyo na nakatuon sa mga maralita.
Naghandog din ng kani-kanilang mensahe sila Department of Social Welfare and Development Asec. Noel Macalalad na kumatawan kay Sec. Rolando Joselito D. Bautista, at sa mga Commissioners ng PCUP na sina Comm. Norman B. Baloro, Comm. Randy H. Halasan, Comm. Romeo H. Jandugan, at Comm. Melvin P. Mitra.
Ilang sa mga agencies na ito ay ang DSWD, DOH, AFP, Philippine Army, PAO, DENR, PCSO, CDO Foodsphere Inc, GRAB Philippines, Ideal Vision, Coca-Cola Foundations, at marami pang iba.
Mula sa mga ito ay nakapaghandog din ng messages of support and responses ang ilang kinatawan mula sa DOH para sa PCUP Caravan, mula sa MCKE Caring Heart Foundation para sa Adopt An Urban Poor Community Program, mula sa Archipelago Philippines Ferries Corporation para sa Urban Poor Privilege Card, at mula sa Jollibee Group Foundation para sa PCUP Relief Operations.
Samantala, nagpapatuloy ang mga programa at serbisyo ng PCUP para sa mga maralitang tagalungsod kahit na may kinahaharap na pandemya ang bansa. ###
PCUP FOD-NCR, dumalo sa BSAAC Deliberation ng DOTR North-South Commuter Railway Project sa Caloocan
21 Disyembre 2021
Ginanap noong ika-14 ng Disyembre ang isang Beneficiary Selection Awards and Arbitration Committee Deliberation para sa DOTR North-South Commuter Railway Project na dinaluhan ng PCUP – Field Operations Division for NCR (FOD-NCR), sa pmamagitan nina Ms. Merlyn L. Sunga at Mr. Benildo D. Latorre—Area Coordinators.
Isa ang aktibidad na ito sa mga binibigyang prayoridad ngayon ni PCUP Chairperson at CEO, Usec. Alvin S. Feliciano dahil aniya ay kailangang mabigyan ng katiyakan sa paninirahan ang mga maralitang tagalungsod na apektado ng anumang proyektong pang-imprastraktura ng pamahalaan.
Samantala, isinagawa ang deliberasyon para sa may kabuuang 15 pamilya mula sa Barangays 19, 21, and 33 na apektado naman ng nasabing DOTr project. ###
via | PCUP NCR
Malasakit Health Forum ng PCUP, matagumpay na naisagawa
21 Disyembre 2021
Matagumpay na nagsagawa ng isang Health Forum na may pamagat na ‘Government Health Care Programs Information Dissemination for the PCUP Accredited Urban Poor Leaders Nationwide’ ngayong araw, Disyembre 21 ang Presidential Commission for the Urban Poor (PCUP), sa pangunguna ng Health Unit nito para sa mga lider-maralita ng iba’t ibang urban poor organizations (UPOs) ng bansa na ginanap via Zoom VTC.
Sa pagbubukas ng programa, nagbigay ng kanyang mensahe ng pagbati at pasasalamat si PCUP Chairperson at CEO, Usec. Alvin S. Feliciano dahil sa partisipasyon ng mga maralitang tagalungsod sa health forum na aniya ay malaking tulong upang bigyang kaalaman ang mga ito ukol sa iba’t ibang paksang pangkalusugan lalo’t higit ngayong pandemya. Sinundan naman ito ng kanya-kanyang mensahe mula kay President-Mayor Rodrigo Roa Duterte, Senator Christopher Lawrence ‘Bong’ Go, at sa Commissioners ng PCUP tulad nina Comm. Norman B. Baloro, Comm. Randy H. Halasan, Comm. Romeo H. Jandugan, at Comm. Melvin P. Mitra na nagpabatid ng malugod na pagtanggap sa lahat ng mga nakilahok para sa pagdaraos ng aktibidad.
Nahati sa dalawang bahagi ang programa na kung saan ay nag-imbita ng mga tagapagsalita ang Komisyon upang magbahagi ng kani-kanilang kaalaman kaugnay sa mga paksang medikal at pangkalusugan.
Sa unang bahagi ng aktibidad, naging tagapagsalita si Doctora Henedina “Doc Nedy” Dela Cruz na resident physician ng Komisyon na tumulakay sa ‘COVID-19 Home Care Management’ o mga gawaing-pambahay upang malabanan ang virus na ito; gayundin ang tungkol sa “E-Tanong Mo Kay DOK!” na isang online consultation program ng Komisyon para sa mga kababayang Pilipino na nais magpakonsulta online.
Sinundan naman ito ni Ms. Allison C. Umandap, MSN, RN na isa ring Senior Health Program Officer ng Malasakit Program Office ng DOH na nagbahagi tungkol sa ‘Malasakit Center Program of the Government’ na isang medical initiative ni Sen. Bong Go na naglalayon na tumulong sa mga mahihirap nating kababayan sa anyo ng mura at may-diskwentong medical and laboratory procedures.
Sa pagtatapos ng bawat paksa ay nagkaroon din ng open forum upang direktang makapaglatag ng kani-kanilang mga katanungan ang mga kalahok na malugod namang sinagot ng mga tagapagsalita.
Bilang pangwakas ay isang Christmas greetings ang ipinalabas bilang pambati ng PCUP sa mga maralitang tagalungsod sa darating na Kapaskuhan.
Samantala, kung nais mapanood ang mga naging kaganapan sa nangyaring PCUP Health Forum, maaari itong mapanood via Facebook Live. Buksan lamang ang link na ito: https://fb.watch/a13k8GbP1d/. ###
via | PCUP Health Forum
PCUP FOD-NCR, nagsagawa ng relocation activity para sa mga apektadong pamilya ng DOTR North-South Commuter Railway Project sa Caloocan
21 Disyembre 2021
Nagsagawa ang PCUP – Field Operations Division for NCR (FOD-NCR) ng isang relocation activity para sa naapektuhan ng DOTR North-South Commuter Railway Project sa Barangay 25, C. Namie St., Caloocan City, nitong Disyembre 16.
Ayon kay PCUP Chairperson at CEO, Usec. Alvin S. Feliciano, patuloy na sinisiguro ng Komisyon na nasa maayos na kalagayan at may disenteng relokasyon ang mga pamilyang apektado ng anumang aktibidad ng demolisyon at ebiksyon kaya naman ay mas maigting na relocation monitoring ang ipinanapatupad ngayon ng PCUP.
Samantala, ang naturang aktibidad ay pinangunahan nina Mr. Benildo Latorre at Ms. Merlyn Sunga—Area Coordinators na personal na nagtungo sa lugar upang makita ang kasalukuyang kalagayan ng mga residente.
Base sa isinagawang igawain, may kabuuang 19 pamilya mula sa Barangays 12, 15, 19, 25, 32, at 33 ang marerelocate sa Camarin Residences ng Barangay 175, Camarin, Caloocan City. ###
via | PCUP NCR